Citatepedia^®.com

Green Grow the Rashes

Green grow the rashes, O
Green grow the rashes, O
The sweetest hours that e'er I spend,
Are spent among the lasses, O

There's nought but care on ev'ry han',
In every hour that passes, O
What signifies the life o' man,
An' 'twere na for the lasses, O.

Green grow the rashes, O
Green grow the rashes, O
The sweetest hours that e'er I spend,
Are spent among the lasses, O

The warl'y race may riches chase,
An' riches still may fly them, O
An' tho' at last they catch them fast,
Their hearts can ne'er enjoy them, O.

Green grow the rashes, O
Green grow the rashes, O
The sweetest hours that e'er I spend,
Are spent among the lasses, O

But gie me a cannie hour at e'en,
My arms about my dearie, O,
An' warl'y cares an' war'ly men
May a' gae tapsalteerie, O!

Green grow the rashes, O
Green grow the rashes, O
The sweetest hours that e'er I spend,
Are spent among the lasses, O

For you sae douce, ye sneer at this
Ye're nought but senseless asses, O
The wisest man the warl' e'er saw,
He dearly lov'd the lasses, O.

Green grow the rashes, O
Green grow the rashes, O
The sweetest hours that e'er I spend,
Are spent among the lasses, O

Auld Nature swears, the lovely dears
Her noblest work she classes, O
Her prentice han' she try'd on man,
An' then she made the lasses, O.

Green grow the rashes, O
Green grow the rashes, O
The sweetest hours that e'er I spend,
Are spent among the lasses, O

poem by Robert Burns
Added by Veronica Serbanoiu
Comment! | Vote! | Copy!