Lo gens temps de pascor
Lo gens temps de pascor
ab la frescha verdor
nos adui folh'e flor
de diversa color,
per que tuih amador
son gai e chantador
mas eu, que planh e plor
c'us jois no m'a sabor
a totz me clam, senhor
de midons e d'Amor,
c'aicist dui traïdor,
car me fiav' en lor
me fan viur'a dolor
per ben e per onor
c'ai faih a la gensor,
que no.m val ni.m acor.
Pois fom amdui efan
l'am ades e la blan;
e.s vai m'amors doblan
a chascu jorn del an.
E si no.m fai enan
amor e bel semblan,
cant er velha,.m deman
que l'aya bo talan.
Las! e viure que.m val,
s'eu no vei a jornal
mo fi joi natural
en leih, sotz fenestral,
cors blanc tot atretal
com la neus a nadal,
si c'amdui comunal
mesuram s'em egal?
Be fór'oimais sazos,
bela domna e pros,
que. m fos datz a rescos
en baizan guizardos,
si ja per als no fos,
mas car sui enveyos,
c'us bes val d'autres dos,
can per fors'es faihz dos.
Bel Vezer, si no fos
mos enans totz en vos
laissat agra chansos
per mal dels enoyos.
[...] Read more
poem by Bernard de Ventadorn
Added by Poetry Lover
Comment! | Vote! | Copy!
